5日係葡萄牙巨星C朗拿度（C.Ronaldo）39歲生日，曼聯（Man United）官網不計前嫌，出PO向呢位之前同會方鬧得極不愉快嘅球星送上生日祝福，距離雙方破冰嘅日子都唔會遠。

曼聯官方社交媒體上載一張C朗身穿曼聯7號球衣嘅圖片，背向鏡頭，配文寫道：「祝C朗度過一個非常愉快嘅生日。」hashtag係CristianoRonaldo全寫。至於C朗個人社交網近期一個PO係展示上半身結實肌肉，39歲仍然保持極佳狀態。

C朗生涯兩度效力曼聯，上陣346場入145球64助攻，贏過3次英超同1次歐聯，第2次加盟紅魔首季即成為球隊首席射手，不過第2季同新上任嘅坦哈格（Ten Hag）鬧翻，加上兒子夭折等不愉快事件，前年世盃前接受訪問數臭曼聯，之後雙方提前解約，世盃後轉戰沙特聯賽。

曼聯近日醞釀變天，最大轉變係新股東拉特克利夫上場，坦哈格地位岌岌可危，而C朗始終係曼聯icon人物，同佢修補關係點都好過保住隻坦克。