周四(16日)凌晨歐聯B組，馬德里體育會主場同波圖打和0比0，今季回巢馬體會嘅基沙文後備上陣，冇建樹之餘，更加成為馬體會球迷公敵，比賽過程之中不斷被喝倒采，明顯仍然未原諒呢位「叛徒」2年前轉投巴塞隆拿。

基沙文今場56分鐘入替祖奧菲臘斯，隨即被馬體會球迷嘘爆，西班牙傳媒指呢位法國國腳當年曾經拍紀錄片，聲稱會留效馬體會，但最終都係轉投巴塞隆拿，令馬體會球迷覺得受到欺騙，所以佢今季回巢，自然不受球迷歡迎。

賽後馬體會教練施蒙尼認為基沙文必須盡快提升狀態，以行動重奪球迷歡心：「由於過去發生嘅事，令基沙文現時面臨挑戰，我哋都希望佢可以提升表現，用實質貢獻回應批評佢嘅人。」

基沙文重投馬體會之後，上陣2次仲未有入波或助攻，希望下場西甲對畢爾包，佢可以踢番場爭氣波啦。